Рама за шпански El Pais: Веќе не очекуваме ништо од ЕУ

24

Албанскиот премиер Еди Рама, во интервју за тиражниот шпански весник El Pais дадено ден пред денешниот самит ЕУ-западен Балкан, вели дека „веќе не очекуваме ништо од Европската унија“

„Научивме, на тешкиот пат, да не очекуваме ништо, бидејќи видовме дека Европа не е во многу добар момент, има многу внатрешни проблеми и проширувањето не се чека со ентузијазам“, изјавил Рама за самитот, пренесува Top Chanel.

Запрашан за извештаите за високи нивоа на корупција во неговата земја, премиерот вели дека не е сè веродостојно.

„Ситуацијата е поинаква. Некои извештаи треба да се земат многу внимателно: како се прават, кој ги прави, итн. Тие не се научни и немаат врска со реалноста. Не велам дека Албанија нема проблеми со корупцијата, бидејќи тоа би било лага, но дека воопшто не може да се спореди со пред осум години. Секако дека е земја со проблеми бидејќи доаѓаме од долго и болно минато“, вели Рама мислејќи на комунистичкиот режим.

Рама додава дека 30 години се многу време во животот на една личност, но ништо во текот на историјата, нагласувајќи дека процесот на градење институции не е лесен.

Новинарот се задржал и на навредите кон новинарите, на што Рама рекол дека „ тоа се нешта од минатото извадени од контекст“.

„Јас лично не сум навредил никого! Јас само зборував за феноменот на лажни вести, неосновани обвинувања… дел од она што јас го нарекувам мрзливо новинарство. Кој се чувствува навреден, веројатно е негов проблем“, посочува Рама.

Доколку преземете содржина од оваа страница, во целост сте се согласиле со нејзините Услови за користење.