Реформа на МОН за вклучување на повеќе ученици во училишните спортови

96

Сто илјади ученици треба да бидат вклучени во училишните спортски активности со новата реформа на училишниот спорт што денеска ја најави министерството за образование и наука.

Министерството за оваа цел подготви Акциски план, интернет страница и распоред и резултати, а за да се зголеми популарната на училишните спротив тие ќе бидат и медиумски покриени од Македонската радио телевизија.

„Предвидено е воведување нови програмски содржини за организирано спортување, односно масовен спорт, преку кој е можно вклучување на голем број ученици, како натпревари од атлетските крос дисциплини, планинарски и велосипедски тури и слично. Освен новите содржини, ќе продолжи да се реализира редовниот систем на училишни натпревари од март до јуни, во домаќинство на повеќе општини“, рече министерот за образование и наука Ристовски.

Акцискиот план предвидува во секое училиште да се формира училишен спортски клуб, што ќе ги реализира активностите и спортските натпревари. Во општините со повеќе од пет училишта ќе се формираат општински сојузи за училишен спорт, задолжен за спроведувањето на натпреварите и спортските манифестации, согласно со калнедарот на натпревари и пропозициите на Федерацијата за училишен спорт.

Директорот на Агенцијата за млади и спорт Марјан Спасески информираше дека од новите програмски содржини најпрво ќе се почне со училишен атлетски крос во март, од кој националниот напревар за сите основни и средни училишта ќе биде на 17-ти и 18 мај 2014. Во периодот март-јуни во Скопје ќе се реализира и обука за непливачи „Научи да пливаш“, а од 21-ви до 27 март и од 13-ти до 19 октомври годинава ќе се организира „Недела на движењето“ за деца од рана и претшколска возраст.

Според податоците на Федерацијата на училишен спорт, во последните неколку години околу 35.000 основци и средношколци или меѓу 8 и 10 проценти учествуваат во училишни спортски активности. Целта на овој проект е вклученоста да достигне до 50 отсто за што, како што посочија на прес-конференција, ќе придонесе и подобрувањето и инвестирањето во спортската инфраструктура и новите спортски сали низ Македонија.

Доколку преземете содржина од оваа страница, во целост сте се согласиле со нејзините Услови за користење.