Рекорден број починати и приклучени на апарати поради Covid-19 во Грција

Со 93 починати лица од Covid-19 во последните 24 часа, Грција забележа уште еден негативен рекорд за 2021 година според бројот смртни исходи, а рекорден е и бројот на пациенти приклучени на апарати на Одделите за интензивна нега во грчките болници, вкупно 802, односно 21 повеќе од ден претходно.

Според официјалните податоци од Националната организација за јавно здравје на Грција регистрирани се 4.033 нови случаи, од кои 1.812 се во областа Атика, поширокиот регион на Атина, а 554 во Солун.

Од почетокот на епидемијата, во Грција има 301.103 потврдени случаи на Covid-19, починаа вкупно 9.054 лица.

Грција од 7-ми ноември 2020 година во карантин, со полициски час и задолжителни смс пораки за секое движење на граѓаните и забрането е патување меѓу градови.

Пред дваесеттина дена се отворија фризерските салони и археолошките локалитети, минатиот понеделник се отвори малопродажбата, но под посебни услови, а од вчера учениците од повисоките класови и од средните училишта се вратија во училишните клупи.

Доколку преземете содржина од оваа страница, во целост сте се согласиле со нејзините Услови за користење.