САД ги поддржуваат мирните протести во Иран

9

Белата куќа ги осуди иранските власти поради употреба на сила во дводневните демонстрации поради зголемување на цената на горивото, при што загинаа најмалку две лица.

– САД ги поддржуваат Иранците и нивните мирни демонстрации против режимот што треба да владее со нив. Ја осудуваме употребата на сила против демонстрантите и рестрикцијата на комуникациите, изјави портпаролката на американската администрација Стефани Гришам.

Според иранските медиуми откако почнаа протестите уапсени се повеќе десетици луѓе.

Иранскиот врховен лидер ајатолахот Хамнеи ја поддржа одлуката на Владата, донесена во петокот, за зголемување на цената на горивото и го осуди насилството од страна на демонстрантите.

Според иранската новинска агенција ИРНА еден полицаец им подлегнал на раните што ги здобил за време на судирите со демонстрантите во Керманшах, западен Иран. Еден демонстрант загина во Сириџан, јужниот дел на земјата, кога учесниците во протестот се обидувале да запалат еден магацин со гориво.

Иран е во рецесија по 2018 година и едностраното повлекување на САД од мултилатералниот договор за иранската нуклеарна програма постигнат во 2015 година и американските санкции кон Техеран.

Доколку преземете содржина од оваа страница, во целост сте се согласиле со нејзините Услови за користење.