САД вчера ставија вето на нацрт резолуцијата на ОН која Кувајт ја претстави во Советот за безбедност, а со која се повикува на заштита на Палестинците во Газа и на Западниот брег.
Во нацрт резолуцијата се осудува израелското користење сила против палестинските цивили за време на протестите поради отворањето на амбасадата на САД во Ерусалим, при што беа убиени над 80 Палестинци. Од Вашингтон, пак, сметаат дека документот е едностран поглед во кој Хамас не се осудува за неодамнешните насилства.
Терористичката група Хамас ја носи главната одговорност за очајните услови за живот во Газа, изјави американската амбасадорка во ОН, Ники Хејли пред гласањето.
Од 15 членки на Советот за безбедност, десет гласаа за резолуцијата, меѓу кои и Кина, Франција и Русија, а само САД беа против. Четири држави беа воздржани, меѓу нив и Британија.
На резолуција ѝ се потребни девет гласови за да биде изгласана, но на неа не смее да стави вето ниедна од петте постојани членки на Советот за безбедност.
Само САД гласаа „за“ за својата предлог-резолуција за осуда на движењето Хамас за настаните во палестинската енклава во последните недели. Русија, Боливија и Кувајт гласаа против американскиот предлог, а останатите 11 земји членки на Советот за безбедност беа воздржани.
