Столе порача дека Игор Карачиќ со кого седум години играше за Вардар, ќе биде во улога на поразен.
Во ракометниот клуб Вардар пред дуелот со Кјелце, в сабота од 17.30 часот во „Јане Сандански“, не откриваат дали Даинис Криштопанс ќе може да игра, но во каков состав и да истрчаат Црвено-црните, одат на победа со помош на публиката.
„Тежок натпревар е пред нас. Ситуацијата во групата покажува дека секој добиен меч те носи напред, а секој пораз те враќа чекор назад. Имаме проблеми со повредите, но ние на секој меч одиме на победа. Засега не можам да кажам кој ќе игра, а кој нема да може. Тоа важи и за Криштопанс. Утре ќе треба да знаеме дефинитивно“, рече тренерот Едуард Кокшаров.
Капитенот Стојанче Стоилов потсетува дека Кјелце е добро познат противник на Вардар, но овојпат ќе треба да се игра и против Хрватот Игор Карачиќ, кој седум години настапуваше за Вардар и остави неизбришлива трага во развојот на клубот со којшто освои две европски титули.
„Кјелце ни е голем ривал, секогаш играме интересни мечеви против нив. Наше е да одиграме најдобро што можеме и да се обидеме да победиме. Очекувам голема поддршка и од публиката. Тие се екипа слична како нашата, многу се борбени. Очекувам тензија, машка игра и на крајот некој ќе плаче. Против Карачиќ сум играл во репрезентацијата, се надевам дека тој ќе си замине разочаран од салата Јане Сандански“, порача Стоилов.
