СДСМ да се охрабри и да го стави интересот на граѓаните пред теснопартискиот

47

Во СДСМ се исплашени, бидејќи знаат дека народот веќе нема намера да ги трпи нивниот криминал и неспособност, па затоа избегаа од одлука за распишување предвремени парламентарни избори и оставија лидерот и премиер Зоран Заев да избере еѓу интересите на народот и државата од една страна и интересите на криминалниот картел од друга, стои во соопштението на ВМРО-ДПМНЕ во саботата

„Предвремените парламентарни избори се единствен спас за Македонија, која оваа власт ја зави во црно. Црнилата се присутни секаде, во економијата, здравството, образованието, земјоделието, безбедноста, социјалната заштита, буквално во секој сегмент од општеството. СДСМ две години не направи ништо за државата и граѓаните. Потрошија милијарди евра народни пари, а нема ниту еден проект. Сите инфраструктурни зафати од време на ВМРО—ДПМНЕ беа запрени, за сега по две години да продолжат таму каде што ВМРО—ДПМНЕ застана“, се вели во реакцијата на опозициската партија откако претходната ноќ владејачката СДСМ на седнмиците на своите највисоки партиски тела одлучи да го одложи носењето одлуки за избор на кандидат за шеф на државата и за прифаќање да се одржат истовремени и предвремени парламентарни избори.

Од ВМРО-ДПМНЕ, исто така, оценуваат дека актуелната власт ги донела граѓаните на работ од егзистенцијата, како и дека парите се слеваат во компаниите блиски на СДСМ и, како што велат, криминалниот картел на власт.

„СДСМ не бира начин како да земе денар повеќе од џебот на граѓаните, затоа ги покачија и даноците и удрија врз пазарџиите, само со една цел, да има повеќе пари за зделки во четири очи и милионски тендери на кои најчесто добиваат фирми основани непосредно пред објавување на огласите„, се потенцира во соопштението.

Од партијата подвлекуваат дека СДСМ ја претвори Македонија во криминална држава, а според индексот на корупција на Транспаренси, државата е на 107 место во друштво со земји како Танзанија.

„Понижувањето на државата и хаосот не смеат да продолжат. СДСМ мора да си замине. Црнилата ќе бидат поразени. Зората мора да изгрее. Потребни се итни предвремени парламентарни избори. СДСМ треба да се охрабри и барем еднаш да го стави интересот на граѓаните пред тој на партијата и криминалниот картел“, заклучуваат од ВМРО-ДПМНЕ.

Доколку преземете содржина од оваа страница, во целост сте се согласиле со нејзините Услови за користење.