СДСМ: Заради остварување на бизнис интереси, Јакимовски е подготвен да ја жртвува безбедноста на граѓаните

Изминатиов викенд, поточно во саботата навечер, во детскиот парк спроти студентскиот дом “Гоце Делчев” се случи немил настан, кадешто шестгодишно девојче буквално летна заедно со конструкцијата на лулашката од паркот, а за потсетување, ова е истиот парк кој пред неколку дена беше помпезно отворен од градоначалникот во заминување Стевче Јакимовски, тврдат од СДСМ.

„Директна одговорност за овој настан имаат Општина Карпош и градоначалникот. Имено, дел од реквизитите во детскиот парк меѓу кои и оваа лулашка се поставени од друг субјект а не од изведувачот на паркот. Истите реквизити како што изјавува изведувачот на паркот не поседуваат сертификати за безбедност и имаат лош квалитет во споредба со останатите содржини за деца.

За жал, ваквото однесување на локалната власт е уште една потврда дека Јакимовски е подготвен да ја жртвува безбедноста на граѓаните, вклучително и на најмладите, само за да го оствари својот бизнис интерес.

Безобразието на Јакимовски и општината оди дотаму што наместо да преземат одговорност, тие тврдат дека некој намерно ги оштетувал реквизитите за да се случи некаков инцидент. Наместо преку соопштенија да создаваат конструкции и теории на заговор за наводни саботажи, доколку Јакимовски и Општина Карпош навистина се грижат за граѓаните, треба да ја преземат одговорноста за овој случај и да направат итна инспекција на сите други реквизити на ова и на другите игралишта, за во иднина да не се повтори ваков инцидент.

На Општина Карпош и се потребни итни потреби. Затоа веќе оваа есен граѓаните на Карпош ќе го казнат расипничкото и коруптивно владеење на Јакимовски, ГРОМ и ВМРО-ДПМНЕ. Новата локална власт предводена од СДСМ посветено ќе работи во интерес на граѓаните и општината. Ќе има ревизија на сите проекти, а особено на оние кои се посветени на најмладите жители на Карпош. Безбедноста на граѓаните и функционалноста на општината во ниеден случај не смеат да бидат доведени во прашање. Ќе има одговорност за секоја злоупотреба на парите на граѓаните“, рече во понеделникот Душко Весковски, претседател на ОО СДСМ Карпош.

Доколку преземете содржина од оваа страница, во целост сте се согласиле со нејзините Услови за користење.