Премиерот Зоран Заев и неговиот министер за внатрешни работи Оливер Спасовски или го кршат Уставот и законите набавувајќи бланко обрасци за патни исправи со променето име Северна Македонија или прават криминална зделка во којашто набавуваат огромна количина обрасци со името Република Македонија, а за десетина дена планираат да го сменат уставното име, посочи бна прес-конференцијата во саботата членот на Извршниот комитет на ВМРО-ДПМНЕ Орце Ѓорѓиевски.
„Министерот за прогон и тортура Оливер Спасовски неодговорно и криминално управува со МВР и буџетот со кој располага ова министерството. Според информациите кои ги објавија медиумите околу 240.000 бланко обрасци за пасоши чекаат на царина на само неколку дена пред гласањето на уставните промени во Собранието“, рече Ѓорѓиевски.
Претставникот на најголемата опозициска партија посточи дека владата којашто најави гласање на уставните измени до 15-ти јануари набавила околу 240.000 бланко обрасци.
„Дали овие обрасци се со името Република Македонија или со името кое Заев и Ципрас го договорија? Доколку обрасците се со името Република Македонија, а власта го промени името на државата во Собрание тогаш тие 240.000 обрасци вредни милиони евра ќе бидат неупотребливи и ќе треба да се уништат, а парите дадени за нивна набавка ќе бидат директна штета за државата. Во вториот случај доколку обрасците за пасоши се со името Северна Македонија, што ќе се случи доколку името не помине во Собрание, дали повторно истите се неупотребливи и ќе треба да се уништат“, праша Ѓорѓиевски.
Потенцираше дека Заев и Спасовски мора да одговорат, колку ќе ги чинат граѓаните нивните аматерски потфати.
„Колку пари од буџетот наместо за целисходни работи ќе завршат по кој знае кој пат на буниште? Дали ваквата набавка на обрасци кои потоа ќе се уништат е всушност планирана активност на власта и зад истата се кријат бизнис интереси? Заев и Спасовски се должни да одговорат! Набавката на обрасци за пасоши на само неколку дена пред гласањето на уставните измени во Собранието за промена на името е неодговорно трошење на парите на граѓаните. Ваквиот аматеризам и неодговорен однос кон МВР и парите на граѓаните мора час поскоро да запре. Очекуваме Оливер Спасовски да смогне сили и да понесе одговорност за сите пропусти и грешки кои ги направи изминатиот период раководејќи со МВР“, додаде Ѓорѓиевски.
