Балкан

Серија убиства на Албанци во Грција

Серија убиства на Албанци во Грција

По убиството на 18-годишниот Марио Исаку во грчкиот град Кавала, остро реагираше албанското Министерство за надворешни работи, искажувајќи голема загриженост за, како што вели, серијата убиства на Албанци во Грција.

„Остро ја осудуваме позадината на екстремизмот и говорот на омраза што ги придружува овие настани во соседната земја и ги повикуваме грчките власти да ги осудат и да спречат какви било обиди на Златна зора или на други екстремистички сегменти да се закануваат на безбедноста и достоинството на Албанците, кои работат и придонесуваат во соседната земја“, стои во во реакцијата.

Министерството искажува загриженост „за серијата убиства на Албанци“ и истовремено изразува сочувство со нивните семејства.

„Во услови кога нашите сонародници го чувствуваат притисокот на невидена кампања на омраза и насилство, ја изразуваме заложбата на албанската држава да им обезбеди на жртвите и на нивните семејства потребна правна и финансиска поддршка за заштита на нивните основни права како членови на најголемата емигрантска заедница, која живее и со децении придонесува во Грција“, се наведува во реакцијата.

Безживотното тело на младиот Исаку, роден во Кавала во 2000 година, а по потекло од Албанија, е пронајдено во вторникот ноќта. Ова, според министертвото е четврто убиство на албански граѓанин во последните две недели.