Си-Ен-Ен: Полицијата замолкнала лекар кој предупредил за коронавирусот

72

Кинески лекар од Вухан кон крајот на декември се обидел да предупреди за коронавирусот, меѓутоа бил замолчен од страна на полицијата, објави Си-Ен-Ен.

Доктор Ли Венлианг (34) на 30 декември пуштил порака преку апликацијата ВатсАп дека седум пациенти во болницата во која работи се заразени од вирус сличен на САРС и дека се во карантин.

Тој појаснил дека станува збор за коронавирус кој припаѓа на фамилијата вируси во кои се и тешките акутни респираторни синдроми, пренесува Си-Ен-Ен.

Меѓутоа, во рок од неколку часа неговата порака станала вирална.

– Кога видов дека циркулира, сфатив дека е надвор од моја контрола и дека најверојатно ќе бидам казнет, рече Ли.

За кратко време полицијата на Вухан го обвинила дека шири гласини, а во меѓувреме и тој се заразил и се наоѓа на интензивна нега.

Вирусот кај него е дијагностициран од 1 февруари, а се заразил од пациент кој го лекувал.

Во меѓувреме, добил опомена и од болницата, од каде му било побарано да појасни како знаел за случаите. На 3 јануари бил повикан во полиција на сослушување поради наводно ширење дезинформации, иако на 31 декември е прогласена епидемија на коронавирус.

Доктор Ли бил принуден да потпише изјава во која го признава својот „прекршок“ и во која ветува дека нема да направи нови „незаконски дејства“.

Полицијата досега нема одговор на прашањата на Си-Ен-Ен за случајот со Ли.

Доколку преземете содржина од оваа страница, во целост сте се согласиле со нејзините Услови за користење.