Синдикатите на полицијата на протестот побараа нов колективен договор

Независниот синдикат на полицијата денеска одржа протест на кој му се приклучија и други синдикални организации од (КСОМ). На протестот, кој го нарекоа „предгенерална проба“ како најава за влегување во еден вид работнички национален штрајк, од НСП побараа подобрување на условите за работа, повисоки плати, нови униформи и потпишување нов Колективен договор и нова систематизација. Оттаму се спротивставија на, како што неофицијално дознале, веќе потпишаниот Колективен договор меѓу МВР и Македонскиот полициски синдикат.

По завршување на протестот на НСП, со исти барања, но одделно се јавија и од Синдикатот на полицијата, кој е член на Конфедерацијата на слободни синдикати, а беше дел од НСП.

Претседателот на НСП Гоце Делчев Тодев реагираше на претставувањето на МПЦ како единствен репрезентативен синдикат.

– Не може НСП да излегува пет години за шумската полиција, за затворската полиција, за судската полиција, да ги реши прашањата за сите. Не може вработените во полицијата, излегувајќи и давајќи поддршка за овие три синдикални структури, да ги реши прашањата, а МПС да се претставува за единствен репрезентативен синдикат. Е, тоа нема да може. Кажувам многу пати, меѓутоа од денеска па натаму не може на некој да му е замрзната функцијата генерален секретар во тој синдикат, не знам по кој член од кој било закон, работното место да си го покачи за едно ниво повеќе – изјави претседателот на НСП Гоце Делчев Тодев.

Претседателот на Синдикатот на полицијата Орце Коцевски побара европски колективен договор од МВР.

– Колективен договор со одредби, со коишто ќе спречат незаконските распоредувања. Колективен, со кој полицијата ќе добие подобри услови и права. Бараме професионалци на чело на МВР – порача Коцевски.

Покрај НСП, на протестот свои барања упатија и други синдикати членови на КСОМ.

Претседателот на независниот синдикат на Управата за водење на матични книги Тони Милошевски истакна дека неколку години се трудат да воведат нов начин на размислување и делување и да им докажат на вработените дека тие стојат зад нив, ги штитат нивните права и слободи гарантирани со Устав. Тој посочи дека НСУБМК испратил отворено писмо до премиерот Зоран Заев во кое, меѓу другото, бара потпишување на Колективен договор и исплата на К 15.

– Од премиерот Заев побаравме во најкус можен рок да се потпише колективен договор, исплата на К 15, да се изготви план стратегија за вакцинација против ковид-19, признавање на дипломите за факултетско образование за лица вработени со средно, како и добивање на поголемо звање според поминат стаж. Очекуваме во целост да ни се исполнат нашите барања –  истакна Милошовски.

Тој рече дека масовноста на протестот денеска го охрабрува дека се на правиот пат и дека само сплотени и единствени можат да го вратат достоинството на работникот.

Од Министерството за внатрешни работи велат дека работат на нов колективен договор, а на маса се разгледуваат сите предлози.

– Работната група формирана во Министерството за внатрешни работи веќе работи на новиот колективен договор и во моментов се разгледуваат и се земаат предвид сите доспеани предлози, при што ќе бидат прифатени сите оние кои се оправдани и кои ќе доведат до подобрување на положбата на вработените во оваа институција. За МВР е посебно важно да се направи квалитетен колективен договор кој ќе претставува реална рамка за остварување на работничките права, велат од министерството.

Претходно од независниот полициски синдикат реагираа дека МВР не сака да го усвои колективниот договор кој овој синдикат го подготвил уште пред 3 години, а кој според нив е поблиску до европските вредности отколку документот на МВР. Последниот колективен договор беше потпишан во 2015 година меѓу тогашната министерка Јанкуловска и Македонскиот полициски синдикат.

Доколку преземете содржина од оваа страница, во целост сте се согласиле со нејзините Услови за користење.