Скопјанец осомничен дека ја повредил мајка си​ и со нож се заканувал на целото семејство

Јавен обвинител од Основното јавно обвинителство Скопје поведе постапка против 24-годишен скопјанец, осомничен дека сторил кривично дело – Телесна повреда од член 131 став 2 во врска со став 1 од Кривичниот законик.

-На 31 јануари, во семејниот дом во селото Љуботен, осомничениот со умисла физички ја нападнал и телесно ја повредил неговата мајка. По претходна вербална расправија, тој најпрвин започнал да ја удира оштетената со тупаници по главата и по телото, нанесувајќи и телесни повреди. Подоцна во текот на денот, додека оштетената седела во дневната соба со сопругот и другиот син, осомничениот се вратил држејќи нож во рацете и им се заканил на сите дека ќе ги убие, информираат од Обвинителството.

Имајќи предвид дека осомничениот и претходно го имал сторено истото кривично дело, но неговата мајка не го пријавувала, како и можноста тој да се даде во бегство, јавниот обвинител до судијата на претходна постапка од Основниот кривичен суд Скопје достави предлог за определување мерка притвор. Судијата го прифати предлогот и на осомничениот му определи притвор во траење од осум дена.

Доколку преземете содржина од оваа страница, во целост сте се согласиле со нејзините Услови за користење.