Филмот „Соба со пијано“ на режисерот Игор Иванов премиерно ќе биде прикажан во САД на годинешното јубилејно издание на Интернационалниот филмски фестивал во Чикаго, вопрстижната секција „World cinema“.
Фестивалот во оваа секција преку изборот од околу 30 наслови, секоја година, се смета дека го прикажува најдоброто од реномирани автори и нови визионери.
Минатата година, оваа програма прикажа филмови на режисерите Lonesome Solo, Jafar Panahi, Adrian Sitaru, Jirí Menzel, Lúcia Puenzo, Mahamat-Saleh Haroun, Amat Escalante, Malgoska Szumowska, Nanouk Leopold, Kore-eda Hirokazu, Amit Kumar, Christoffer Boe, Giorgio Diritti, Agnés Jaoui и Arvin Chen.
Интернационалниот филмски фестивал во Чикаго, ќе се одржи од 9-ти до 23-ти октомври. Се смета за најстариот компетитивен фестивал во Северна Америка и еден од водечките на американскиот континент препознатлив по постојаната потрага и претставување на најдобрите и оригинални филмски дела и автори.
Во меѓувреме, во рамки на регионалното претставување, „Соба со пијано“, вечерва, ќе ја има својата хрватска премиера, во официјалната конкуренција на интернационалниот фестивал Филм Форум Задар.
На проекцијата ќе присуствуваат продуцентот Томи Салковски и актерите Наташа Петровиќ, Симона Спировска, Јагода Кумриќ и Дениз Абдула.
