Собранието сепак ќе има пет потпретседатели

Пратениците денеска со 60 гласа „за“ и 22 „против“ ја усвоија Одлуката за утврдување на бројот на потпретседателите на законодавниот дом, откако претседателот на Собранието, Талат Џафери, предложи да има петмина потпретседатели.

Во образложението на предлогот, повикувајќи се на Деловникот и на Законот за Собрание, се наведува дека „бројот на потпретседателите го утврдува Собранието, по предлог на претседателот. Потпретседателите се избираат од редот на пратениците кои припаѓаат на различни политички партии застапени во Собранието“.

Изборот на потпретседатели на Собранието ќе се врши на друга собраниска сеница.

Во август портпаролот на ВМРО- ДПМНЕ, Димче Арсовски, рече дека нивната партија ниту прифаќа, ниту ќе предложи потпретседател на Собранието, по што лидерот на СДСМ, Зоран Заев, рече дека ако ВМРО-ДПМНЕ се откаже од своето право на потпретседател во Собранието тоа ќе го стори и СДСМ.

Според Деловникот, опозицијата има едно потпретседателско место, две предлага Комисијата за избори, а другите две се на мнозинството.

Доколку преземете содржина од оваа страница, во целост сте се согласиле со нејзините Услови за користење.