Сообраќајот на патиштата се одвива по влажни коловози, а на некои од повисоките места во западните и југозападните делови од државата има остатоци од кашест снег на коловозот, соопшти Авто-мото сојузот на Македонија.
Врнежи од снег со променлив интензитет се бележат во Охрид, Струга, Крушево, Штип, Делчево, Железнец и на планинските превои Буково, Ѓавато и Пресека. Намалена видливост поради појава на магла до 100 метри има на планинскиот превој Стража. Од АМСМ потсетуваат дека задолжително е поседување на зимска опрема во возилата.
Интензитетот на сообраќај на патните правци надвор од градските средини е умерен. На граничните премини нема подолги задржувања за влез и за излез од државата. Оваа информација се однесува само за македонската страна на премините.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е појава на одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.
