Спасовски – Мишел: Ја очекуваме новата методологија за проширување на ЕУ

22

Техничкиот премиер Оливер Спасовски го прими во петокот претседателот на Европскиот совет, Шарл Мишел кој допатува во работна посета на нашата земја на покана на претседателот на Стево Пендаровски.

Спасовски го пречека високиот гостин од Брисел и се задржа со него на тет-а-тет разговор.

На средбата Спасовски изрази благодарност за зголеменото внимание и отворените јавни изјави за поддршка за што поскоро отворање на пристапните преговори уште на почетокот од преземањето на мандатот на Претседателот на Европскиот Совет, Мишел, и изрази очекување дека датумот за старт ќе дојде бргу по усвојувањето на новата методологија за проширување, откако земјите членки на ЕУ ќе дадат согласност за усвојување за да се испочитуваат ветувањата дадени за Северна Македонија во изминатиот период.

Спасовски потенцираше дека за нашата земја тајмингот е од клучно значење, за да не се загрози реформската динамика која допрва треба да ја постигне својата кулминација, како и Преспанскиот договор во неговата важна имплементациска фаза во претстојниот период.

На средбата претседателот на Европскиот совет беше запознаен со подготовките за спроведување на изборите кои треба да ги организира преодната Влада во која сега учествуваат и министри од опозицијата согласно Пржинскиот договор.

Спасовски истакна дека освен учеството во непреченото функционирање на Владата, од опозицијата се очекува и одговорен пристап во донесувањето на Законот за јавно обвинителство, да се издигне над политикантските калкулации и да прифати дека треба да учествува во усвојувањето на законот и да биде дел од европска иднина на  Македонија.

Мишел на средбата истакна дека неговата посета на нашата земја, во која пристигна од Тирана, има за цел да испрати силна порака дека иднината на Македонија и на Албанија е во Европската унија, како и да искаже пораки за охрабрување за континуирано спроведување на реформските процеси и имплементација на обврските на земјата од договорите со Грција и Бугарија

Доколку преземете содржина од оваа страница, во целост сте се согласиле со нејзините Услови за користење.