Македонија

Специјална олимпијада Македонија ја почна програмата „Млади атлети“

Специјална олимпијада Македонија ја почна програмата „Млади атлети“

Со почетокот на програмата „Млади атлети“ на Специјална олимпијада Македонија го одбележуваме меѓународниот ден на спортот 6 април.

Програмата „Млади атлети“ е наменета за деца со и без интелектуална попреченост на возраст од 2 до 7 години, кои преку спортот ќе се запознаат со основните спортски вештини, како што се трчање, шутирање и фрлање, а преку образовните и забавните активности ќе ги развиваат своите социјални вештини.

Програмата ќе трае 6 месеци, во Скопје и Тетово, се одвива двапати седмично и во себе опфаќа 3 големи јавни презентации преку кои ќе се демонстрираат вештините стекнати од програмата и завршен спортски настан кој ќе биде заокружување на програмата.

„Целта на оваа програма е заедништво на децата со и без интелектуална попреченост, кои ќе можат да играат и да се дружат, да научат повеќе едни за други и меѓусебно да се разбираат. Воедно сакаме да бидеме поддршка на социјалната инклузија и инклузивната игра во училиштата,заедницата и домовите; да укажеме на тоа дека сите деца треба да се ценат за нивните таленти и способности и да промовираме здрав живот и учење за децата да останат активни“ – вели Ана Петровска национален директор на Специјална олимпијада Македонија.

„Млади атлети“ е поддржана од обучен тренерски тим на Специјална олимпијада МАкеоднија и волонтери од гимназијата „Нова“ и им нуди на семејствата, наставниците, старателите и лицата од заедницата можност да ја споделат радоста што доаѓа од спортот со сите деца.

IMG_0273

Програмата „Млади атлети“ се спроведува како дел од регионалниот проект финансиран од Европската унија и кофинансиран од УНИЦЕФ „ Заштита на децата од насилство и промовирање социјална инклузија на децата со попреченост во Западен Балкан и Турција“.