Голема ќе биде нашата иднина ако ја гледаме добронамерно, порачаа шефовите на дипломатиите на Македонија и Грција. Сериозни доцнења со имплементација на обврските од Преспанскиот договор, а Никола Димитров и Никос Дендиас со воздржани одговори и дипломатски пораки.
Дендиас го повтори ставот на грчката Влада дека и покрај тоа што не се согласуваат со него – Преспанскиот договор е завршена работа и мора целосно да се импементира.
Тој е без конкретен одговор: Зошто Грција се уште ги нема променето имињата на патоказите и дали новиот бренд „Macedonia The Great“ е вистинскиот потег во време кога треба интензивно да работаат Комисиите.
Имаме еднакви – реципрочни обврски, тоа се однесува на брендовите и трговските марки – доколку секој од нас ја почитува и другата страна ќе бидеме навистина големи , изјави Димитров. Тој смета дека претстојните избори нема да ја успорат Спогодбата од Нивици, бидејќи истата е дел од правниот систем и мора да се почитува.
Грција ја разбира разочараноста за недобивањето датум и има долгорочна стратешка цел – влез на Западен Балкан во ЕУ, порача Дендиас. Според него, услуга не може да се направи никому – како Грција го помина овој тест така треба и останатите земји кандидатки. Во меѓувреме официјална Атина ќе преземе иницијатива за поскоро отворање на европската врата, но какви чекори ќе направи грчкиот премиер Мицотакис останува да се види.
Ова е прва официјална посета на шефот на грчката дипломатија, по промената на власта во Грција овој јули. Никос Дендиас пристигна со алтернативниот министер за надворешни работи задолжен за економија – Константинос Фрагојанис, а покрај Димитров оствари средба со премиерот Заев и претседателот Пендаровски.
