Средба на Џафери со амбасадорот Рамеш

Претседателот на Собранието Талат Џафери, во средата го прими во проштална посета амбасадорот на Чешката Република во Република Македонија, Мирослав Рамеш, кој му врачи лична честитка и честитки од претседателите на Долниот дом на Парламентот и на Сенатот на Чешката Република за изборот на функцијата претседател на Собранието.

Амбасадорот ја подвлече натамошната подготвеност на Чешката Република да помага на Република Македонија со конкретна материјална и човечка помош во справувањето со мигрантската криза, бидејќи Република Македонија ги брани границите за Чешката Република, но и за цела Европа од напливите на мигранти. Постои стравување од ескалација на мигрантскиот бран од Африка, и заради тоа Чешка, заедно со останатите држави од Вишеградската група, и понатаму силно ќе ја поддржува Република Македонија со конкретна финансиска и материјална помош и со припадници на полициски сили распоредени на јужната граница.

Истовремено, Чешката Република и во иднина силно ќе ја поддржува Република Македонија на планот на нејзината конечна интеграција во Европската унија и НАТО.

Џафери го информираше амбасадорот за тековните активности во Собранието бидејќи, и како што нагласи „само со затворање на отворените прашања и посветено решавање на проблемите можеме неоптоварени да продолжиме напред во овие процеси, бидејќи тоа го посакуваат и очекуваат преку 70 отсто од граѓаните на Република Македонија”.

Соговорниците констатираа дека Република Македонија и Чешката Република во континуитет остваруваат солидна билатерална соработка на сите нивоа и изразија уверувања дека соработката ќе продолжи и во иднина, по одржувањето на парламентарните избори во Чешка во октомври оваа година.

Изразувајќи поддршка за продолжување на натамошна поблиска меѓупарламентарна соработка, како на ниво на претседатели на парламенти така и на ниво на пратенички групи за соработка, соговорниците се согласија дека воспоставените пријателски односи треба да се негуваат со силна посветеност и меѓусебна доверба.

Доколку преземете содржина од оваа страница, во целост сте се согласиле со нејзините Услови за користење.