Судот во Стразбур утре ќе ја објави одлуката за поништената аболиција на Иванов

Европскиот суд за човекови права утре во Стразбур ќе ја објави одлуката за случајот со поништената аболиција на поранешниот претседател Ѓорге Иванов.

Станува збор за аболицијата од април 2016 година со која Иванов опфати 56 лица осомничени во поголем број предмети кои беа под ингеренции на тогашното Специјално Јавно Обвинителство. Аболицијата предизвика реакции и улични протести, кои резултираа со измени во Законот за помилување за да му се отвори простор на Иванов за повлекување на аболициите.

Во предметот се засегнати и поранешните функционери од ВМРО-ДПМНЕ како екс премиерот Никола Груевски, министрите во неговата влада Гордана Јанкуловска и Миле Јанакиески, првиот човек на Управата за безбедност и разузнување Сашо Мијалков, но и тогашниот лидер на СДСМ, Зоран Заев.

Во објавата на Судот се наведува дека подносители на жалбата се осумина граѓани на Република Северна Македонија.

Европскиот суд, по пет ипол години од поднесените апликации, ќе даде одговор дали предметите на СЈО и судењата кои се во тек ќе продолжат или ќе запрат и ќе се поништат, а обвинетите и осудените, при евентуално поништување, ќе можат од државата да бараат обесштетување.

Доколку преземете содржина од оваа страница, во целост сте се согласиле со нејзините Услови за користење.