Направивме многу промени и првпат после долги години се обезбеди огромна количина нови современи фактори за коагулација, тоа се т.н. рекоминантни фактори, соодносот во однос на плазматскиот фактор сега е 50:50, со оглед на нивниот огромен недостиг што постои генерално во Европа, истакна денеска министерот за здравство Венко Филипче на одбележувањето на Светскиот ден на хемофилија.
Друга предност, посочи, е што рекоминантните фактори што досега беа застапени со 20 отсто од вкупниот број фактори даваат многу помалку компликации и многу помалку стимулираат развој на инхибитори со што дополнително се комлицира лекувањето на овие пациенти.
– За сите пациенти со хемофилија чиј број е 320 од кои 46 се деца направивме централна набавка на национално ниво и првпат значајно за повеќе од сто проценти ги зголемивме рекоминантните фактори. Нашата интенција ќе биде процентот на рекоминантните фактори да го зголемуваме и да продолжиме со овие централизирани набавки и да ги вклучиме и децата – рече Филипче и додаде изготвена е 10-годишна Националната стратегија за хемофилија и останати вродени нарушувања на системот за коагулација со која се детерминираат начините за рано откривање и третман на оваа болест.
Претседателот на Здружението за лица со хемофилија, Фон Вилебранд и ретки коагулопатии „Хемолог“, Цветанка Наќеска и претседателот на извршниот одбор на Здружението, Муедин Зибери укажаа на еден од успесите, а тоа е формирањето Комитет за хемофилија со решение на министерот и активно ќе учествуваат во креирањето на политиките за хемофилија. Посочија дека треба да се зголемат количините препарати и да се воведат нови препарати за третман на болните.
Фото: МИА