Американскиот претседател Доналд Трамп се состана со директорите на 10-те најголеми светски фармацевтски компании и од нив побара да го забрзаат развојот на вакцината и да пронајдат делотворни третмани против коронавирусот.
Во меѓувреме, бројот на случаите на заразени и умрени во САД и натаму се зголемува, откако во американската сојузна држава Вашингтон починаа девет лица.
-Поверојатно е дека терапиите ќе бидат достапни пред вакцината да биде подготвена и се трудиме сите делотворни третмани да ги изнесеме на пазарот што е можно побрзо, рече Трамп по состанокот со директорите на фармацевтските компании.
Тој вети дека ќе се намали бирократската процедура за компаниите кои работат на изработката на третманите. Тој, меѓутоа, не понуди финансиска помош, пренесува Гласот на Америка.
-Ги познавам компаниите многу добро. Некои од нив се толку богати што мислам дека всушност тие треба да и позајмат пари на федералната влада, рече Трамп.
