Американскиот претседател Доналд Трамп се очекува да ја продолжи за до крајот на годината извршната наредба за спречување на имиграцијата, потег за кој при донесувањето во месец април рече дека ќе ги заштити американските работници среде економската криза од појавата на коронавирусот.
Тогаш Трамп изјави дека новата 60-дневна забрана ќе важи за оние кои бараат постојан престој, или „зелени картони“ да живеат во САД, но не и за привремените работници, а дека забраната може да биде обновена за уште 60 дена или подолго.
Сепак се очекува да трае подолго, до крајот на годината, пишува Политико, повикувајќи се на две лица запознаени со преговорите.
Туристичките и долгорочните деловни визи во САД не се сметаат за доселенички визи. Во последнава категорија спаѓаат првенствено визите за временски неограничен престој, одредени работни визи и дозволите за престој за брачни партнери или членови на семејства на американски државјани.
