Триесет и шест повредени во протестите во Белгија

Триесет и шест лица се повредени, а од нив дваесет и четири се во болница по вчерашните протести во Белгија. Своето незадоволство го искажале повеќе од 120 илјади учесници, 30 лица се приведени, а десетиц возила опожарени.

Трите главни синдикати ги организираа демонстрациите против намерите на федералната Влада за ограничување на трошоците во јавната сфера, за зголемување на даноците и за зголемување на возраста за пензионирање.

Синдикатите повикаа средствата што недостигаат (долгот е 100 отсто од БДП) да се побараат кај богатите.

Дополнително протестите разгореа по информациите дека богати семејства и приватни и државни фирми како Белгаком и банката Дексиа избегнувале плаќање данок со регистрирање претставништва во Луксембург. Така тие фирми плаќале во белгиската каса данок од 2,3 отсто, додека останатите плаќаат меѓу 30 и 50 отсто данок на приходи.

Премиерот Шарл Мишел, кој ја презеде должноста пред помалку од еден месец, изјави дека вратите за преговори со синдикатите се отворени, а виновниците за немирите во Брисел ќе бидат изведени пред суд.

Тој додава дека планираните владини мерки имаат цел создавање нови работни места и обезбедување стабилност на системот за социјални трошоци.

Следните големи протести се закажани за 15 декември.

Доколку преземете содржина од оваа страница, во целост сте се согласиле со нејзините Услови за користење.