Според Ројтерс, бројот на заболени од коронавирус во светот достигна 30 милиони луѓе и нема знаци дека пандемијата го забавува ширењето.
Глобалниот дневен број на нови случаи на инфекција достигна рекордно ниво во последните денови, а евидентирани се смртни случаи од близу 1 милион луѓе, додека истовремено се забрзува меѓународната трка за развој и дистрибуција на вакцините.
Официјалниот број на случаи со коронавирус во светот сега е повеќе од пет пати поголем од бројот на случаи на тежок грип регистриран на годишно ниво, покажуваат податоците на Светската здравствена организација (СЗО).
Речиси 1 милион смртни случаи поврзани со коронавирус се пријавени ширум светот, што значително го надминува бројот на смртни случаи поврзани со класичен грип, што се движат помеѓу 290 000 и 650 000 годишно.
Индија вчера стана втора земја во светот, зад Соединетите држави, што забележала повеќе од пет милиони случаи.
Оваа јужноазиска земја, втора по бројност во светот, забележала повеќе случаи отколку САД од средината на август и само тоа претставува нешто повеќе од 16 проценти од вкупните случаи во светот.
САД имаат околу 20 проценти од глобалните случаи, иако имаат само 4 проценти од светската популација. Бразил, третата најпогодена земја во светот, има околу 15 проценти од глобалните случаи.
Беа потребни само 18 дена за бројот на случаи на инфекција во светот да се зголеми од 25 милиони на повеќе од 30 милиони. Исто така, беа потребни 20 дена за бројот да се зголеми од 20 милиони на 25 милиони и 19 дена да се зголеми од 15 на 20 милиони.
Глобалната стапка на нови случаи забавува, како одраз на напредокот направен од многу земји во борбата против болеста, и покрај некои големи зголемувања на бројот на случаи во одредени држави.
Здравствените експерти истакнуваат дека официјалните податоци скоро сигурно покажуваат помалку случаи на инфекција и смрт отколку што всушност изнесуваат, особено во земјите со ограничен капацитет за тестирање.
Трката да се развие вакцина и да се донесе на пазарот се вжештува во последните неколку недели, со околу 200 кандидати на глобално ниво.
Американскиот претседател Доналд Трамп изјави дека неговата земја може да ја подготви вакцината за дистрибуција пред претседателските избори на 3 ноември, додека кинески здравствен службеник оваа недела објави дека Кина може да има готова вакцина за јавна употреба најрано до ноември.
Иако ширењето на коронавирусот сè уште заостанува зад шпанскиот грип од 1918 година, кој зарази околу 500 милиони луѓе, убивајќи најмалку 10 проценти од нив, експертите се грижат дека достапните податоци го потценуваат реалното влијание на пандемијата.
