Украина побарала од САД итно снабдување со 500 противтенковски ракети Javelin и 500 проектили за противвоздушна одбрана Стингер дневно, објави во четвртокот Си-Ен-Ен, повикувајќи се на документ претставен на американските пратеници.
Западните земји испраќаат оружје и воена опрема во Киев, но претседателот Володимир Зеленски вели дека тоа не е доволно за да се одбрани рускиот напад што беше извршен пред еден месец.
Си-Ен-Ен цитира извори кои велат дека Украина бара „стотици повеќе“ проектили отколку во претходните барања испратени до пратениците. Обраќајќи им се на лидерите на земјите-членки на НАТО преку видео врска во четвртокот, Зеленски рече дека не добил „јасен одговор“ на барањето за „еден процент од сите ваши тенкови“.
НАТО и САД одбија да воспостават зона на забранети летови над Украина или да го снабдуваат Киев со воени авиони од советската ера, стравувајќи дека тоа би можело да предизвика директен конфликт со Русија.
Блокот, сепак, ја потврди својата поддршка за Украина, додека земји како Британија и Шведска ветија дека ќе испратат дополнително противтенковско оружје. Американскиот претседател Џо Бајден во четвртокот изјави: „Нашето оружје тече во Украина додека зборувам“.
Ројтерс во четвртокот објави дека Белата куќа започнала консултации за испорака на противбродски ракети во Украина.
„Можеби има некои технички предизвици за тоа да се случи, но тоа е нешто на што се консултираме со сојузниците и почнуваме да работиме“, изјави официјален извор за Ројтерс.
Извештајот дојде истиот ден кога украинскиот Генералштаб тврдеше дека руски десантен брод бил уништен во пристаништето Бердјанск во Азовското Море, додека други два брода биле оштетени. Украинските власти претходно ги обвинија руските воени бродови дека пукале во Одеса, пристаниште на Црното Море.
Русија не коментираше ниту една од овие изјави.
