Руското Министерство за одбрана во средата ги обвини „украинските националистички сили“ дека извршиле „исклучително опасна провокација“ со напад на трафостаница и далноводи кои обезбедуваат електрична енергија на нуклеарната централа Чернобил.
Претходно, украинските власти тврдеа дека прекинот на струјата е вина на Русија и дека може да ја доведе „Европа во опасност“.
„Во моментов, украинската страна прави се што е можно за да избегне организација на поправка и реставрација. Според нас, ова уште еднаш го потврдува апсолутно намерниот и провокативен карактер на дејствијата на националистите“, рече заменик министерот за одбрана Николај Панков на специјалниот брифинг.
Панков рече дека руските специјалисти се погрижиле централата да се напојува со резервни дизел генератори, додека рускиот заменик-министер за енергетика Павел Сорокин посочи дека централата може да се приклучи на белоруската енергетска мрежа за да се обезбеди електрична енергија на трајна основа.
„Би сакале да нагласиме и предупредиме дека секое нарушување на работата на компресорските станици или провокации против нив е одговорност на украинските власти. Тоа е нивна договорна обврска, одговорност е на украинската страна“, рече Сорокин.
Руските трупи ја презедоа контролата врз централата во Чернобил неколку часа по влегувањето во Украина, пред две недели, иако во последните денови се забележани спорадични борби.
Украинската компанија за нуклеарна енергија, Енергоатом, претходно во средата предупреди дека комуникацијата со Чернобил е изгубена и дека објектот „целосно е исклучен од електричната мрежа“. Бидејќи руските трупи дејствуваат во областа, компанијата тврдеше дека украинските работници за поправка не можат да стигнат до централата за да ја вратат електричната енергија.
Украинскиот министер за надворешни работи Дмитро Кулеба изјави дека штом ќе завршат резервните дизел генератори на централата, „системите за ладење на складиштето за потрошено нуклеарно гориво ќе престанат, со што ќе дојде до истекување на радијација“. Ова, рече тој, ќе ја стави „цела Европа во опасност“.
Меѓутоа, Меѓународната агенција за атомска енергија набргу потоа соопшти дека „нема критично влијание врз безбедноста“ во централата.
„Поради времето поминато од несреќата во Чернобил во 1986 година, топлинското оптоварување на базенот за складирање на потрошеното гориво и волуменот на вода за ладење содржана во базенот се доволни за да се одржи ефективно отстранување на топлината без потреба од снабдување со електрична енергија“, соопшти МААЕ во претходно ажурирање.
Сместено на околу 100 километри северно од Киев и 10 километри од границата со Белорусија, Чернобил е местото на една од најголемите нуклеарни катастрофи во светот. Катастрофалното топење на еден од неговите реактори во 1986 година предизвика огромен пожар и изложи илјадници луѓе кои живеат во близина на опасни нивоа на радијација. Големи површини околу фабриката остануваат непогодни за живеење до ден-денес, и иако централата повеќе не произведува електрична енергија, таа бара постојано одржување за да се избегне нова несреќа.
