Аналитичарот за безбедност и криминалистика Љубомир Ѓурчески вечерва на Алфа телевизија во емисијата „Што не е јасно“ истакна дека ние како држава сме во катастрофална состојба, затоа што во делот на безбедноста имаме огромно потфрлање.
Денеска јавно сите медиуми зборуваат дека мафијата ја контролира власта во Република Македонија, наместо напротив власта или државата да ја контролира мафијата, односно безбедна држава е онаа држава којашто го контролира криминалот. Хаотични состојби ни се случуваат нам престрелки, пукотници, потфрлања имаме пораст на бројот на наркоманијата, многу послаби резултати со пронаоѓање на сторители кои се занимаат со трговија на дрога, порача Ѓурчески.
Истакна дека не може да се прераспоредуваат полициски службеници спротивно на законските прописи со обична времена наредба, таа пракса треба да се отстрани затоа што е недозволиво на таков начин да се санкционираат полициски службеници затоа што некој така сметал.
Треба да се сфати една засекогаш во МВР дека не може да си играат со професионалниот тим со полициските службеници, па некој да ги прераспоредува спротивно на законските прописи, со наредба да го прераспоредуваат условно кажано полициски службеник во ПС Чаир на некому му текнало затоа што не му се допаѓал на старешината или не извршил некоја наредба којашто ја оценил дека е спротивна на закон, некој го прераспоредил на Солунска глава полицискиот службеник. Но со наредба не му се дава решение,затоа што ако му даде решение има право на судски спор, затоа што наредбата е со времен рок од 6 месеци. Таа пракса еднаш засекогаш треба да се исече, не можете вие со наредба некого да санкционирате, вели аналитичарот Ѓурчески.
Во однос на новата систематизација која се случи непосредно пред создавањето на техничката влада рече дека недозволиво е да се случи нова систематизација пред најавени избори и прераспоредувања на полициски службеници пред избори, нормално е дека истиот процес ќе му се стави политичка етикета.
