Вице Заев, братот на лидерот на СДСМ Зоран Заев, во допис до медиумите вели дека објавените разговори се лаги од трети лица кои нема да ги попречат да даваат плати и да плаќаат даноци.
„Објавените рекла-казала лаги од трети лица нема да ги попречат Заеви да даваат плати и да плаќаат даноци. Целосно ги отфрлам како лаги и манипулации објавените рекла-казала муабети во кои трети лица го спомнуваат моето име. Тоа се очајни лаги произлезени од фејкњуз подрумите на опозицијата. Заеви се чесни и вредни Македонци. Режимските инсталации нема да не спречат да продолжиме да даваме плати, да плаќаме даноци и да ги помагаме македонските граѓани“, се вели во рекцијата на Вице Заев.
Тој реагира на аудиснимката којашто претходно во саботата беше објавена и на нов Јутјуб канал, насловен како „Вице мафијашот“. Разговорот во кој се слушаат две лица е именуван како „Вице даде зелено светло да запалам коли“.
Според тврдењата на каналот станува збор за разговор меѓу активист на владејачката СДСМ од Битола и бизнисмен поврзан во партијата кој добила бизниси во комбинатот РЕК Битола, во кој се споменуваат и активности за ослободување лица од притвор, како и давање „зелено светло“ за трговии со медицинска марихуана итн.
