Видео| Силен земјотрес од 7,1 степен според Рихтер утрово ги погоди Филипини

Земјотрес со јачина од 7,1 степен според Рихтеровата скала е регистриран на Филипините утрово во 2:43 часот, соопшти ЕМСЦ. Епицентарот на земјотресот бил на длабочина од 10 километри и 13 километри југоисточно од гратчето Долорес на островот Лузон. Се почувствувал и во главниот град Манила, на повеќе од 400 километри оддалеченост од епицентарот, каде работниците и жителите се евакуирале од зградите и се собрале на улиците.

Филипинскиот институт за вулканологија и сеизмологија ги предупреди граѓаните на можноста од последователни потреси, но додаде дека нема опасност од цунами, пишува Си-ен-ен.

Претставничката Чинг Бернос рече дека земјотресот „предизвика штета на многу домаќинства и институции“. Фотографиите од покрианата Абра покажуваат значителни штети на некои згради.

Гардијан јави дека најмалку две лица загинале, а десетици се повредени.

Епицентарот на земјотресот е во провинцијата Абра во планинска област, изјави шефот на филипинскиот институт за вулканологија и сеизмологија, Ренато Солидум.

„Земјата се тресеше како да сум на лулашка и светлата наеднаш се изгаснаа. Истрчавме од канцеларијата и слушнав крици, а некои од моите придружници беа во солзи“, рече Мајкл Брилантес, офицер за безбедност во градот Лагангиланг во Абра, во близина на епицентарот.

Доколку преземете содржина од оваа страница, во целост сте се согласиле со нејзините Услови за користење.