Само околу 20 од израелските заложници се држат од Хамас и тие се држат со лисици како жив штит околу водачот на оваа милитантна група, Јахја Синвар, изјавиле разузнавачки извори за JC.
Синвар е опколен со заробениците, кои се држат со него под земја. Израел веќе имал неколку можности да го елиминира откако ги лоцирал тунелите во кои се криел, но нападот не бил одобрен поради опасноста за заложниците, посочуваат разузнавачките извори.
Се верува дека останатите заробеници, живи и мртви, се во рацете на помали терористички групи.
Ова откритие за другите израелски заробеници, засновано на информациите собрани од израелското разузнавање во соработка со информаторите од Газа и заробените терористи, фрла нова светлина врз сложеноста на обезбедувањето договор за заложници, што моментално е предмет на интензивни преговори во Катар.
Многу израелски киднапирани лица се држени од помали терористички групи како Палестински исламски џихад, Народниот фронт за ослободување на Палестина, бригадите муџахедини, бригадите Ал-Насер Салах ал-Дин и Бригадите на мачениците Ал Акса, тврдат изворите.
Помеѓу овие и Хамас на Јахја Синвар постојат одредени спорови. Додека Синвар бара ослободување на затворениците од Хамас како приоритет, тие сакаат и затворениците од нивните редови да бидат застапени на списокот. Ова ги натера да размислуваат за државен удар против Хамас во последните месеци.
Тие, исто така, тврдат дека не смее да се направи компромис со Израел, инсистирајќи дека каков било договор вклучува ослободување на сите терористи од израелските затвори, вклучително и 1.236 убијци кои се осудени на доживотен затвор.
Тие, исто така, се противат на предлогот на Израел да ги депортира сите затвореници кои Израел ќе ги ослободи како дел од договорот од Газа и Западниот Брег.
Непопустливоста што ја покажаа овие помали групи – кои се наоѓаат во тунелите што се протегаат од кампот Ал Шати на северот на Појасот до големи области меѓу Кан Јунис и Рафах, го разбесни Синвар откако тие ги следеа неговите наредби на 7 октомври. Ова дополнително ги влошува односите меѓу нив.
Всушност овие внатрешни палестински судири беа камен на сопнување на патот за договор за заложници. Дополнително, ситуацијата ја услужнува фактот што безбедноста на Синвар зависи од заробениците.
Главните барања на Синвар се крај на војната и повлекување на ИДФ од целиот Појас Газа. Тој, исто така, бара американски гаранции дека Израел нема да ја продолжи војната по завршувањето на договорот за заложници.
Ова е одговор на повеќекратните јавни најави на премиерот Бенјамин Нетанјаху дека војната ќе биде завршена само откако Хамас ќе биде уништен и заложниците ќе бидат ослободени.
Покрај тоа, Синвар инсистира на ветување од Израел, поткрепено со американска гаранција, дека нема да биде ликвидиран откако ќе се согласи да ги ослободи заложниците што ги поседува.
Друга пречка во неодамнешните разговори е прашањето за коридорот Филаделфи, тесен појас на земја меѓу Газа и Египет низ кој се провлекуваат шверцерските тунели.
За да ја врати својата осиромашена воена моќ, на Хамас му треба коридорот Филаделфи, преку кој може да продолжи со шверцот на оружје, како што тоа го правеше 20 години пред 7 октомври.
Нетанјаху се противи на ова, иако знае дека тоа би можело да го торпедира договорот. Ова е и покрај ветувањето на Египет дека ќе постави објекти за надзор под земја и ќе изгради железен ѕид за да го спречи шверцот.
Коридорот Филаделфи беше воспоставен по завршувањето на повлекувањето на Израел од Синај во 1982 година, по мировниот договор со Египет. Тоа е површина од околу 14 километри долга и 8 километри широка, која се протега преку јужниот раб на Појасот Газа од Израел до Средоземното Море.
Кога Хамас се зајакна и консолидираше како народно движење на отпорот, а потоа и како терористичка организација, и успеа да ја преземе контролата врз Појасот Газа во јуни 2007 година, тој доминираше и во целата шверцерска индустрија преку коридорот Филаделфи.
Патот на шверцот се протегаше од Иран преку Персискиот Залив до Црвеното Море, поминувајќи ги пустините на Судан и Египет, преку Синај и оттаму во Газа. За кратко време, коридорот беше место на добро подмачкана машина за шверц на оружје. Ова вклучуваше ракети со голем дострел, противтенковски и противвоздушни ракети, па дури и се прошири на готовина и луѓе.
Тоа беа ирански експерти кои се инфилтрираа во Газа за да ги научат терористите на Хамас како да ги користат софистицираните средства за војување што им ги доставија, или домашните милитанти од Газа беа испратени на обука во странство.
Израел сега го контролира и ја држи територијата со цел да го спречи оружјето и другите работи кои доаѓаат преку – или под – египетската граница.
Разговорите во Катар се обновени, но пробивот останува неостварлив. Израелски извори веруваат дека Синвар можеби игра со времето, одложувајќи ги своите одговори со надеж за поширока регионална војна што ќе го окупира ИДФ и ќе го пренасочи од Газа на северот на Израел.
Истовремено, Хамас ги охрабрува терористичките активности на Западниот Брег дополнително да ја оптоварат израелската армија. Според разузнавачки извори, Синвар го задолжил Захер Џабарин – кој беше осуден во Израел на доживотен затвор, но ослободен во 2011 година како дел од размената на затвореници за Гилад Шалит – да ја спроведе активноста.
Џабарин моментално работи од Турција и се смета за главен финансиер на Хамас, сметаат израелски извори. Се претпоставува дека тој во последно време префрлал големи суми средства добиени од Иран за да поттикне терор на Западниот Брег.
