Република Македонија од вчера, покрај здравствената ситуација во којашто се наоѓа. е во прилично сложена и сериозна ситуација и на надворешен план. Владата на Зоран Заев и СДСМ потфрли во ЕУ интегративниот процес, посочува Димче Арсовски, портпарол на ВМРО-ДПМНЕ
„Трета година по ред Зоран Заев, заедно со Никола Димитров ги лажат граѓаните дека добиваме датум за преговори и дека ги отпочнуваме преговорите. Оваа лага излезе на површина и за жал, штетата сега ја трпат сите граѓани и самата држава Република Македонија. Зоран Заев, Никола Димитров, Радмила Шеќеринска де факто немаат капацитет да нудат повеќе европска иднина. Тонат во бездна, а со нив ја повлекоа и целата држава и целиот народ. Шарлатанското однесување од типот на „домат дипломатија“ и „љубави, како си, те поздрави Зоки” излезе на виделина и конечно стигна поздравот до Зоран Заев и Владата за нивната несериозност, некапацитетност, некадарност, и негрижа кон државата и граѓаните, како и кон националните интереси“, порача портпаролот на ВМРО-ДПМНЕ.
Арсовски потсети што велеше Зоран Заев на 26.07.2017 година во однос на потпишувањето на договорот за добрососедство со Бугарија, а потоа потсети и на уште едно видео што велеше Зоран Заев во однос на надворешните прашања.
„По сѐ изгледа не било онака како што велел Зоран Заев изминативе неколку години. Во овие моменти, тешки моменти за државата и граѓаните, кога стигна одговорот од бугарската влада за шарлатанската дипломатија на Зоран Заев, не страдаат само Владата на СДСМ, ним им е гајле тие уживаат и ќе уживаат во милионите кои што ги испокрадоа, туку страдаат граѓаните, обичниот народ и самата држава. Поривот за лажење, манипулирање и давање лажни ветувања на Зоран Заев кој што го гледаме изминативе години ја донесе Република Македонија до ќорсокак и до момент кога се што ветувал не може да исполни и затоа му се случува ова сега, не му се случува него, туку за жал штетата ја трпат граѓаните и државата. Бидејќи вчера Стево Пендаровски рече дека бил постигнат договор, па потоа не испаднало така се изјаловила работата, јавно прашуваме, што стоело во тој постигнат договор помеѓу Македонија и Бигарија, односно Заев и премиерот на Бугарија, што содржел истиот договор за кој се согласиле Зоран Заев, Димитров, Османи и Пендаровски, целата влада, а не се согласила бугарската страна?, истакна Арсовски.
Порача дека од актуелната гарнитура на власт очекува „барем еднаш“ да бидат искрени и да не манипулираат и да ги лажат граѓаните, зашто вистината повторно ќе излезе на виделина.
„Зоран Заев, Никола Димитров, Радмила Шеќеринска, ги ставија на тацна и на тезга за распродавање најсветите работи за Македонците, за граѓаните на Република Македонија, а тоа се идентитетот, историјата, нашите херои, нашите емотивни поврзаности со историски моменти и личности. Со нивното пазарџиско однесување, ги ставија граѓаните и државата во положба и позиција дотолку слаба во моментов, што ги наруши трајно, потенцирам трајно ги наруши, сите можни преговарачки позиции на Република Македонија во иднина. Ова што и се случува на Република Македонија и нашиот напатен народ е навистина тажно и жално. И целата вина е сконцентрирана во Зоран Заев. Се надеваме дека немаше да има пречки во овие интегративни процеси доколку Зоран Заев беше чесен и искрен во намерите, а и кон граѓаните и не ги манипулираше сите засегнати страни, па и граѓаните, опозицијата и соседна Бугарија. Изборот со Заев за жал е или асимилација или губење на време како што тој го претставува за ЕУ интеграција, или надвор од ЕУ и целосна блокада на преговорите. Оваа политика на Зоран Заев доживеа фијаско и е сосема извесно дека Заев нема ниту еден успех во надворешната дипломатија, тоа се виде. Удирањето во ѕид значи дека Заев мора да си даде оставка и сите политички субјекти да работат за формирање на Влада на национален спас. Оваа влада во овој формат е повеќе од било кога потребна во моментот“, рече портпаролот на ВМРО-ДПМНЕ.
Арсовски понатаму заклучи дека Заев и сите останати во Владата повеќе немаат капацитет да ја водат државата, потребно е да си дадат оставки и како што реков да се формира Влада по формат за национален спас.
„Ова се моменти кога треба да се размислува рационално и трезвено, а не со капацитетот на размислување на Зоран Заев. Тоа се покажа како неуспешно“, заклучи Арсовски.
