Владиката Агатангел повика на семакедонски протест: Во Европа да влеземе со крената глава

Европа за Македонците не треба да биде срам и понижување, туку таму треба да влеземе со кренати глави. Ова е дел од пораката на владиката Агатангел, во која тој повикува на одржување на семакедонски собир против, како што вели, омаловажувањето на македонскиот национален идентитет и достоинство.

Повеќе македонски здруженија објавија дека го поддржуваат овој протест, закажан за в недела во 17 часот пред канцеларијата на ЕУ и пред македонското Собрание, а вчера и владиката Агатангел повика за учество. Во своето видео обраќање вели дека група млади поттикнати од љубовта кон земјата, а разочарани од немањето македонска национална политичка партија, се иницијатори за овој собир.

„Сите што ја љубите оваа света македонска земја не дозволувајте да ги изневериме нашите прадедовци, кои ги положија животите ние слободно да живееме во едно демократско општество. Сите се трудиме да одиме кон Европа, но Европа за нас не треба да биде срам и понижување. Европа треба да биде гордост и така сакаме со крената глава да влеземе, а не со промена на нашето свето македонско име, непочитување на нашиот македонски идентитет и јазик“, вели владиката.

Тој го повикува секој добронамерен Македонец да дојде и да го искаже своето незадоволство кон неговото понижување, незадоволство, кон неговото омаловажување, немир во срцето и во душата за да му се покаже на светот дека Македонците не се ниту против НАТО, ниту против влегувањето во европската заедница, но сето тоа да биде со крената глава и достоинствено.

„На овој семакедонски собор групно со песна ќе се појде до македонскиот парламент да се искаже незадоволство прво кон промената на светото македонско име, промената и непризнавањето на македонскиот јазик, непризнавањето на МПЦ, која е столб и тврдина на оваа света македонска држава. На демократски начин да се избориме за нашите права“, порача владиката Агатангел и додаде дека за време на протестот треба да се почитуваат сите пропишани превентивни мерки.