ВМРО-ДПМНЕ до Заев: Никој не барал аменстија, со лаги не се подобрува животниот стандард

158

Лагите нема да го подобрат стандардот на граѓаните, тие очекуваат од Зоран Заев да ги исполни ветувањата што ги даде пред избори, а не со манипулации и дезинформации да ги дефокусира од обврските кои ги презеде, се вели во демантот од ВМРО-ДПМНЕ во врска со изјавите на новиот премиер кажани во интервјуто од вторникот вечерта на јавниот сервис МТВ.

„Заев лажеше дека кој и да е д ВМРО-ДПМНЕ во разговорите со СДС побарал каква било амнестија. Човек што е двапати аболициран за криминал веројатно со ваквите дезинформации сака да си подготви терен и за трета амнестила за случајот Поткуп. ВМРО-ДПМНЕ и досега во повеќе наврати демантираше дека воопшто се разговарало со Заев на оваа тема“, се вели во реакцијата.

Од ВМРО-ДПМНЕ истакнуваат дека Заев излажал кога изјави дека во државниот Буџет се останати само 6 милиони евра. Потсетуваат дека токму новиот министер за финансии пред два дена се пофали дека се исплатени околу 77 милиони евра од Буџетот на име на субвенции, стипендии и пензии.

„Вистината е дека новата Влада на СДС во Буџетот доби 130 милиони евра, освен ако Заев не сакаше несвесно да признае дека 124 милиони евра мистериозно исчезнале“, инсистираат од ВМРО-ДПМНЕ.

Тврдат дека Заев во споменатото интервју лажел кога рече дека јавниот долг изнесувал над 50 отсто од БДП, а дека скриениот долг изнесувал над милијарда евра. Фактичката состојба гласи дека јавниот долг на 30.04.2017 година изнесувал 45,9 осто.

„Со овие паушални бројки и лаги, Заев и практично го загрозува кредитниот рејтинг на Република Македонија и ризикува кредиторите во иднина да бараат повисоки каматни стапки“, предупредуваат од ВМРО-ДПМНЕ и истакнуваат дека
особено загрижува начинот на кој новиот социјалдемократски премиер пристапува кон суштинските прашања.
Опасно е човек на негова позиција да ги релативизира сите прашања и дека бега од конкретни одговори и одговорност, порачуваат од ВМРО-ДПМНЕ.

„Граѓаните од него не очекуваат лаги и манипулации, туку очекуваат да ги исполни ветувањата што ги даваше пред избори. Граѓаните очекуваат Република Македонија час поскоро да стане членка на ЕУ и НАТО без да се задира во идентитетските прашања. Граѓаните очекуваат нови 500 километри автопат, а не лаги како изградбата на постојните била закочена. Граѓаните очекуваат 16.000 денари минимална плата и 30.000 просечна, а докторите очекуваат плата од 100.000 денари“, се потсетува во реакцијата.

Доколку преземете содржина од оваа страница, во целост сте се согласиле со нејзините Услови за користење.