ВМРО-ДПМНЕ: Личните бизнис интереси се приоритетите на Заев

Приоритет за Зоран Заев се личните бизнис интереси, а не добросостојбата на граѓаните. Затоа Заев не се занимава со енормното загадување, доцнењето и стотици милиони евра поскапата изградба на клиничките центри во Скопје и Штип, туку се фокусира на предизборно, шверцерско протнување на законот за контрола на опојни дроги, се наведува во соопштението на ВМРО-ДПМНЕ.

Од ВМРО-ДПМНЕ велат дека нивите со марихуана на Вице му се поважни и од датум и од реформи и од изградба на патишта.

-Криминалната власт предводена од Зоран Заев овие три години наместо да донесе живот кој што го ветуваа, донесе живот само за лицата блиски до кланот на Заеви. Во овие три години Заев, заборави на граѓаните и се посвети на полнење на сопствените џебови. За да можат да се полнат џебовите на кланот Заеви, пратениците од СДСМ брзаат да го изгласат Законот за опојни дроги во Собрание. За да можат да се полнат џебовите на кланот Заеви, во погон е ставена и извршната и законодавната власт. Семејството Заеви е вклучено во две компании кои произведуваат марихуана, а според информациите кои кружат се „МАМ“ од Св. Николе и „Фарма медика канабис“ од Валандово, се наведува во соопштението.

Граѓаните го препознаа вистинското лице на власта кое изминатите три години заборави на нивните потреби. Граѓаните гледаат кој работи за нивниот интерес, а кој работи за интересот на криминално-рекетарската банда на цело со аболицираниот Зоран Заев. На 12 Април граѓаните ќе стават крај на овие криминални политики на СДСМ и Заев. На 12 Април граѓаните ќе изберат политики кои ќе бидат насочени кон подобар и поквалитетен живот, посочуваат од партијата.

Доколку преземете содржина од оваа страница, во целост сте се согласиле со нејзините Услови за користење.