Пратеничката група на ВМРО-ДПМНЕ денеска во Собранието поднесе Предлог закон за амнестија на лицата осудени за настаните од 27 април 2017 година. Како што појасни координаторот на пратеничката група на опозициската партија, овој закон е резултат на иницијативата и заедничкаат заложба на адвокатите Јанаки Митрески и Драган Пешевски и целата пратеничка група на ВМРО-ДПМНЕ и коалицијата.
-Многу важно е да се напомене дека е само продолжение на претходниот закон за амнестија кој што е донесен во декември 2018 година, но со една голема и суштинска исправка а тоа е надминување на селективноста и селективната правда која што произлегуваше од законот донесен во 2018 година, истакна Мицевски.
Со овој закон, потенцираше тој, ќе бидат опфатени сите осудени лица за настаните од 27 април без исклучок.
Пратениците од опозициската партија ги повикаа своите колеги од владејачкото мнозинство да го поддржат законот. Доколку не го сторат тоа, ќе покаже и докаже дека, како што рече Мицевски, „за нив селективноста е на прво место, а владеењето на правдата ги нема никаде“.
Координаторот на пратеничката група на ВМРО-ДПМНЕ исто така истакна дека дале поддршка на адвокатите двата процеси да одат паралелно односно да се чека одлуката од Врховниот суд по барањето за вонредно преиспитување на пресудата и носење на закон за амнестија.
Адвокатот Јанаки Митровски, на својот фејсбук профил објави дека првичниот текст е подобрен и во заедничка консултација тргната е одредбата од 50% и се оди на целосно ослободување од казна.
„Првичниот наш текст е подобрен, во консултација со нас е тргната одредбата од 50% и се оди на целосно ослободување од казна.
Текстот е подобрен од страна на пратениците и со тоа што се остава можност секој амнестиран да се жали дека не прифаќа амнестија доколку е тоа негова желба со оглед на фактот дека еден до осудените јавно прокламираше дека не сака амнестија што мора да се почитува.
Јас и Пешевски апелираме до сите политички партии да го поддржат Законското решение кое НЕ навлегува во правото на осудените да си ја продолжат постапката пред Врховниот суд а воедно и не е дека лежат месец, два три туку шеста година се во затвор додека оние со употребна вредност не само што се на слобода туку се и дополнително наградени! Доста е!“, напиша Митровски.
