ВМРО-ДПМНЕ: Владата на СДСМ за девет месеци го чини народот 1,4 милијарди евра

СДСМ неконтролирано и расипнички се однесува со парите на граѓаните во Република Македонија и сведоци сме на секојдневното осиромашување, дека економијата тоне, а трошоците за живот растат, затоа што владата предводена од оваа партија во деветмесечното владеење граѓаните ги чинеше 1,4 милијарди евра, се вели во реакцијата на ВМРО-ДПМНЕ.

Од опозицската партија посочуваат истовремено дека и покрај огромните задолжувања на државата, изостануваат капиталните проекти, како и ветеното зголемување на платите и пензиите.

„Сведоци сме на економски тероризам врз Македонија и нејзините граѓани! Власта предводена од Зоран Заев за да го оттргне вниманието од катастрофалните економски и антидржавни политики прстот го вперува кон политичките неистомисленици прогласувајќи ги за терористи“, велат од ВМРО-ДПМНЕ, отсетувајќи дека истакнати општествени дејци, како пратеници, режисери, доктори, архитекти, полициски службеници се соочуваат со досега невидени обвиненија за тероризам.

Од ВМРО-ДПМНЕ повторни посочуваат дека притворените во врска со настаните од 27-ми април во Собранието не се терористи, туку се луѓе кои не се плашеа гласно да говорат против штетните политики на СДСМ и Зоран Заев.

„Секое продолжување на притворот од страна на Судот е порака до сите неистомисленици и до сите оние кои размислуваат различно од СДСМ. Македонија е единствената земја во Европа каде интелектуалци, актери, режисери и доктори се обвинети за тероризам“, се додава уште во партиската реакција.

Од ВМРО-ДПМНЕ, исто така, се осврнуваат и на состојбите во македонското правосудство, истакнувајќи дека тоа мора своите одлуки и пресуди да ги темели врз почитување на законите и Уставот.

„Досегашните судски процеси покажаа дека ова е класична политичка хајка за замолчување на сите оние кои си ја сакаат оваа држава. Со политички затвореници низ затворите во Македонија нема напредок“, посочуваат од ВМРО-ДПМНЕ.

Бараат, како што велат, да престане „паритискиот прогон“ од страна на владејачката СДСМ и злоупотреба на институциите кои власта ги контролира.

„Власта предводена од СДСМ треба да прекине со сите институционални злоупотреби во државата. Зоран Заев и СДСМ треба да бидат свесни дека во оваа земја постојат луѓе кои секогаш ќе се спротивставуваат на штетните политики со кои се уништува Република Македонија“, се заклучува во реакција.

 

Доколку преземете содржина од оваа страница, во целост сте се согласиле со нејзините Услови за користење.