ВМРО-ДПМНЕ: Во недостиг на резултати, СДСМ го прикажува вработувањето на роднини како економски успех

Со СДСМ на власт македонската економија е пред целосен колапс, сите економски параметри бележат падови,  а граѓаните се повеќе осиромашуваат, обвинуваат од ВМРО-ДПМНЕ.

Додека повеќе од 500.000 граѓани живеат под прагот на сиромаштијата и не можат да се прехранат, СДСМ и нивните функционери единствено се грижат за своите бизниси и да згрижат што е можно повеќе роднини во државните институции. Во недостиг на економски резултати, криминалниот картел вработувањето на своите мајки, татковци, баби, дедовци, золви, снаи, зетовци и лични фризерки почнаа да го прикажуваат како голем економски успех.

Расипничката власт на СДСМ и аболицираниот Заев ја направи Македонија најсиромашна држава во регионот и Европа. Земјите од регионот и Европа доживуваат економска ренесанса, а Македонија благодарение на неспособната влада на СДСМ е закована на дното со срамни 2,05% раст, кој е многу далеку 5 до 7% со кои што Заев ги лажеше граѓаните, се додава во партиското соопштение.

Според ВМРО-ДПМНЕ за неспособноста на оваа власт говори и фактот што и оваа година власта како и минатата нема да успее да реализира ни половина од планираните капитални инвестиции. Оттаму додаваат дека нивото на реализација на капитални инвестиции за месец јануари изнесува мизерен 1%, извозот има пад од 1,9%, а  пад има и ИТ индустријата и тоа од големи 12,6 проценти.

Во услови кога државата економски тоне, власта не запира со задолжувањата. Криминалната власт на СДСМ успеа за прв пат да ја надмине психолошката граница на јавниот долг од 50% и тој веќе надмина 5 милијарди евра за прв пат во историјата на Република Македонија. Сето ова е показател за штетните и катастрофални политики на СДСМ и Зоран Заев  кои се вистинска елементарна непогода за државата и граѓаните. Граѓаните повеќе не смеат да живеат во оваа беда која ја донесе СДСМ. Токму затоа потребно е Заев и  СДСМ заедно со нивниот криминален картел да си заминат за  конечно македонската економија да почне да напредува, се заклучува во соопштението.

Доколку преземете содржина од оваа страница, во целост сте се согласиле со нејзините Услови за користење.