Премиерот Зоран Заев го потона пописот во политика, одбивањето да се собираат потписи на Собранието го покажува стравот од соочување со народот и упорноста да организира попис, кој уште отсега ја подели државата, во соопштение за јавноста во средата истакнаа од опозициската ВМРО-ДПМНЕ.
„Разоткриен е фалсификатот на Заев. Власта и Заев ја отфрлија иницијативата за одложување на пописот поднесена од ВМРО-ДПМНЕ. Власта сака по секоја цена да спроведе фалсификат. Заев знае дека турка попис кој не го прифаќаат граѓаните. Власта е збунета и тоа се гледа по настапите на првите лица на Државниот завод за статистика. На само два месеца пред таканаречениот попис на Заев во власта уште има полемики што ќе се попишува и како, но и кои информации ќе се бараат и кој ќе може да ги даде. Само Заев може да организира попис, кој уште отсега ја подели државата. Наместо со консензус донесен закон, Заев одбра да исполнува коалициони договори, наместо статистичка операција, Заев ќе прави политички пазар“, велат од опозициската партија.
Од таму додаваат дека да не беше жално ќе беше смешно. Кога сите држави во регионот и светот ги откажаа пописите за 2022 година, Заев упорно турка попис сега, во ек на пандемија.
„Доколку власта навистина сакаше попис, ќе го прифатеше предлогот на ВМРО-ДПМНЕ за електронски попис, кој ќе гарантира реални бројки и факти.
ВМРО-ДПМНЕ ќе ги искористи сите механизми да спречи насилен попис, затоа ВМРО-ДПМНЕ ќе отпочне иницијатива за собирање на граѓански потписи и потписи на пратеници за стопирање на очигледниот фалсификат“, стои во партиското соопштение на ВМРО-ДПМНЕ.
