ВМРО-ДПМНЕ: Заев си поигрува со семејствата на жртвите кај Смилковско за да ја сочува коалицијата со ДУИ

Заев заборави сѐ што им кажуваше на родителите на децата убиени кај Смилковско, дали коалицијата со ДУИ е причина за тоа?, прашуваат во саботата од опозициската ВМРО-ДПМНЕ од каде велат дека Зоран Заев и „криминалниот картел“ кој го води ја спроведуваат Тиранската платформа на сметка на правото и правната држава.

Во реакцијата, исто така, се истакнува дека убијците во случајот „Монструм“ се на слобода, а неистомисленици на Зоран Заев неосновано се притвораат.

„Зоран Заев пред изборите тврдеше и ги манипулираше семејствата на убиените дека ја знае вистината за бруталната егзекуција кај Смилковско езеро. Заев, повеќе години водеше морбидна кампања и го искористи свирепото убиство за собирање политички поени. Сега откако е на власт, Заев тврди дека нема докази за ѕверската ликвидација кај Смилковско езеро и дека, ако ги имал истите и ќе ги објавел. Заев лаже и манипулира“, се вели во соопштението на ВМРО-ДПМНЕ.

Од партијата велат дека додека беше опозиција Зоран Заев алудираше на поврзаноста на ДУИ со убијците.

„Според исказот на семејствата, тој им покажувал транскрипти од разговори помеѓу Невзет Бејта и Фејзи Азири, а тврдел и дека пет од броевите кои се заведени како државна тајна се на функционери од ДУИ. Наеднаш Заев заборави на се што им кажуваше на родителите. Дали коалицијата со ДУИ е причина за неговата амнезија?“, се вели во соопштението на ВМРО-ДПМНЕ.

Според ВМРО-ДПМНЕ, Заев и криминалниот картел кој го води си поиграа со целата држава и граѓаните.

„Зоран Заев ги окупираше институциите и ја зароби државата. Правото не се применува, а наместо доказите и аргументите политиката е во преден план. Институциите не работат. Чесни граѓани се влечат по притвори и судови, а веќе осудени убијци се пуштаат на слобода. Државата ништо не презема за правосилно осудените убијци Алил Демири и Африм Исмаиловиќ да бидат екстрадирани во државата, но затоа малтретира лекари, режисери, актери и докажани општествени дејци. Ова незаконие мора да запре. Злоупотребата на институциите и девалвирањето на правото мора да запре. Граѓаните заслужуваат правна држава и стабилни институции. Граѓаните заслужуваат подобро“, во соопштението на ВМРО-ДПМНЕ.

Доколку преземете содржина од оваа страница, во целост сте се согласиле со нејзините Услови за користење.