Новиот сој на коронавирусот, првпат идентификувана во Велика Британија е пронајдена во 10 проценти од случаите во Франција, изјави портпаролот на француската влада Габриел Атал, најавувајќи можност за нови рестриктивни мерки во земјата.
Атал, во изјава за радио France Inter, повтори дека владата на претседателот Емануел Макрон ја разгледува можноста за воведување строго „затворање“, но не даде поконкретни детали.
Франција во средата евидентираше речиси 27.000 нови случаи на коронавирус, што е најголем дневен број од средината на ноември, кога Франција беше во втор „локдаун“, што може да укаже дека сегашните мерки, кои вклучуваат полициски час, не се доволни за да се запре ширењето на вирусот.
