Во Франција од денеска е задолжителна вакцинација против Covid-19 за здравствените работници

17

Во Франција oд денеска стапува на сила задолжителна вакцинација против коронавирусот на лицата кои работат во здравствениот сектор. Мерката е за околу 2,7 милиони луѓе кои се во здравствениот сектор.

За да ја продолжат својата професија, од денеска, ќе треба да обезбедат доказ дека примиле барем една доза вакцина против коронавирусот. Два месеца откако францускиот претседател Емануел Макрон им постави ултиматум на здравствените работници, некои од нив продолжуваат да одбиваат да се вакцинираат. Според најновите податоци на властите, заклучно со 7-ми септември, нешто повеќе од 88 проценти од здравствените работници во болниците и домовите за стари лица примиле барем една доза од вакцината против Covid-19.

Синдикатите на француските медицински лица предупредија дека може да биде предизвикана здравствена катастрофа доколку медицинските лица кои одбиваат да се вакцинираат престанат да ја практикуваат својата професија и ги повикаат властите да избегнат воведување санкции.

Доколку преземете содржина од оваа страница, во целост сте се согласиле со нејзините Услови за користење.