Грчкиот премиер Кирјакос Мицотакис, за време на презентација на Програмата за развој на Јонските острови, соопшти дека в сабота „и официјално ќе започне предизборниот период со распуштање на Парламентот“ во пресрет на парламентарните избори на 21 мај, јави дописничката на МИА од Атина.
Ова практично значи дека задутре, Мицотакис ќе се сретне со претседателката на Грција Катерина Сакеларопулу и од неа ќе побара распуштање на Парламентот, по што ќе започнат и соодветните процедури во пресрет на изборите.
Одлуката за распуштање на Парламентот ќе биде закачена на влезната врата на Парламентот, ќе започне и официјално четиринеделната предизборна кампања, а ќе бидат сменети и одредени министри од Владата, меѓу кои и оној за внатрешни работи, надлежен за изборниот процес.
Иако официјално земјата не е во предизборен период, партиите веќе интензивно започнаа со кампањи, посети низ цела Грција, говори на партиските лидери, средби со граѓани и сл.
На крајот на март за време на владината седница, грчкиот премиер соопшти дека изборите во земјата ќе се одржат на 21 мај 2023 година.
