Првите 550.000 дози од вакцината против Covid-19 на кинеската фармацевтска компанија „Sinopharm“ пристигнаа во вторникот во Будимпешта, соопшти шефицата на еподемиолошкиот оддел на унгарското јавно здравство, Агнеш Галгоци.
Унгарија стана првата земја членка на Европската унија која своите граѓани ќе ги имунизира против коронавирусот и со кинеска вакцина. Будимпешта во јануари објави дека постигнала договор со кинески „Sinopharm“ за купување на пет милијарди дози од вакцината.
Исто така, минатата седмица стана и првата членка на ЕУ која започна да ја употребува руската вакцина „Спутник V“, откако унгарското регулаторно тело го одобри препаратот по итна постпка, нечекајќи одобрение од европската агенција за лекови (ЕМА).
Кинеската вакцината ќе биде пуштена во употреба веднаш откако ќе биде извршена инспекцијата на пратката, појасни Галгоци.
Владата на премиерот Виктор Орбан настојува да го забрза имунизирањето на населението против Covid-19, додека доцнат испораките на вакцините од западните производители. Досега во Унгарија се вакцинирани 3 отсто од населението.
Орбан во понеделникот истакна дека вакцините од ЕУ не стасуваат во Унгарија доволно брзо. Смета дека поради тоа е потребно да се увезат вакцини и од Кина и од Русија, како и од Западот.
„Секоја вакцина којашто е сигурна и со којашто веќе се вакцинирани милиони луѓе е доволно добра за нас. Доколку бидеме внимателни, ќе може да започнеме со попуштањето на рестриктивните мерки“, порача Орбан.
Унгарија, која има 9,77 милиони жители, од почетокот на пандемијата забележала 389.622 случаи на заразата со коронавирусот, а од компликациите предизвикани од Covid-19 починале 13.837 луѓе.
