17.8 C
Skopje
четврток, март 28, 2024

(ВО ЖИВО) Почна прославата на Бадник во Соборниот храм во Скопје

Почна традиционалната прослава на Бадник пред Соборниот храм во Скопје. Пристигнаа кумовите Драган Спасов – Дац и Александар Митевски, како и здравичарот Живко Поповски – Цветин.

Пред Соборниот храм, претходно, со пајтон пристигнаа и стариот кум д-р Никола Пановски, како и минатогодишниот здравичар д-р Миодраг Врчаковски.

Поглаварот на МПЦ г.г. Стефан и свештенослужителите на новите кумови треба да им го предадат Бадникарскиот ќуп. По чинот на предавањето, г.г. Стефан ќе се обрати, а погачата ќе биде осветена.

Спасов, Митевски и Поповски претпладнево го посетија Домот за стари лица во Злокуќани и на штитениците им врачија пригодни подароци по повод големиот христијански празник Божик.

Утрово, пак, на двата влеза во дворот на Соборниот храм, традиционално се делеа бадникови гранчиња. Тие беа осветени, по што беше подигнато Бадникарското знаме и беше интонирана македонската химна.

По завршувањето на церемонијата новите кумови со ќупот заедно со здравичарот со пајтон ќе го напуштат храмот „Свети Климент Охридски“ и ќе се упатат кон своите домови поздравени од скопјани.

Традиционалната прослава на Бадник пред Соборниот храм се одвива согласно сите КОВИД протоколи. На прославата присуствува и градоначалничката Данела Арсовска. Таа на кумовите, но и на сите граѓани им посака бериќет и годинава, како што рече, да биде многу подобра од минатата.

Доколку преземете содржина од оваа страница, во целост сте се согласиле со нејзините Услови за користење.