Вработена во обезбедувањето на аеродром во Њујорк доби отказ од работа откако на еден патник му врачила ливче со рачно напишана порака „Ти си грд!!!“.
Инцидентот се случил во текот на јуни, но за него се дозна пред неколку дена, откако патникот Нил Страснер добил снимка од надзорните камери и ја поставил на „Јутјуб“.
На снимките од меѓународниот аеродром „Грејтер Рочестер“ се гледа како вработената во обезбедувањето му врачува порака на Страснер откако тој поминал низ детекторот за метал.
Страснер вели дека во тие моменти не размислувал за пораката и се упатил кон излезот, но работничката викнала по него: „Зарем нема да ја прочиташ пораката?“
Откако му довикнала, таа започнала да се смее, a Страснер подоцна се пожалил кај нејзините претпоставени.
Одделот за безбедност во сообраќајот соопшти дека жената била времено вработена како припадник на обезбедувањето, додавајќи дека има нулта толеранција за такво поведение на работниците.