Македонските ракометари ја совладаа селекцијата на Бахреин во рамките на второто коло од Светското првенство кое се одржува во Германија и Данска.
Нашите момци натпреварот го завршија со резултат 28:23 и ја оправдаа улогата на фаворити.
Македонија имаше одличен старт на мечот, поведе со 6-2 но потоа дури 11 минути не реализиравме погодок, а Бахреин со серија од 5-0 дојде до водство од 7-6. Во финишот сепак направивме серија од 5-0 и на полувремето заминавме со предност од 12-8.
Во вториот дел избраниците на Раул Гонзалез ги презедоа работите во своите раце, поведоа со највисоки 23-15 и рутинирано ја довршија задачата. На петнаесетина минути пред крајот, шанса добија и младите Митревски, Крстевски и Серафимов од клупата.
Најефикасни поединци кај нашите беа Кире Лазаров со 8 и Дејан Манасков и Филип Кузмановски со по 4 гола. Капитенот беше прогласен и за „Играч на натпреварот“.
Веќе утре, во рамки на третото коло, со почеток од 18 часот, Македонија ќе ги одмери силите со репрезентацијата на Хрватска која ја предводи Лино Червар.
-Позитивни сме, ќе се спремиме. Исланд ме изненади, имаа квалитетен ракомет. Не’ очекуваат тврди и неизвесни натпревари. Ќе го дадеме максимумот против Хрватска, вели Лазаров.
