За БЕСА е прифатлив еден термин за претседателски и за парламентарни избори

Постојаните повици на опозицијата за предвремени избори се прифатливи за опозицијата во албанскиот политички кампус, порача денеска од Тетово претседателот на Движење Беса, Биљал Касами, одговарајќи на новинарско прашање.

– Здружената албанска опозиција е веќе консолидирана и подготвена на следните парламентарни избори дали редовни или вонредни, да победи. Но, сè што е во правец на организирање фер, демократски и прифатливи избори за сите граѓани ние сме подготвени да учествуваме. Во тој правец ние повикуваме што побрзо Владата да рефлектира, да повика средба на лидерите на политичките партии за да се договориме за терминот на предвремените парламентарни избори – рече тој.

Според него, економски поисплатливо е да има заедно и парламентарни и претседателски избори.

– Имајќи ја предвид економската ситуација во државата и трошоците кои се за организирање на изборите, ние инсистираме да имаме еден термин за претседателски и за парламентарни избори со тоа што и редовниот термин е многу близок и цениме дека не треба да се прават дополнителни трошоци само за парламентарните избори да бидат три месеци подоцна – истакна Касами.

Доколку преземете содржина од оваа страница, во целост сте се согласиле со нејзините Услови за користење.