Со цел спречување на внесување, навремено забележување и пријавување на болеста Чума кај мали преживари (овци и кози), која од 22-ри јуни годинава е потврдена и во соседна Бугарија, а во земјите од регионот присутна е и во Турција, Агенцијата за храна и ветеринарство (АХВ) донесе во понеделникот Решение за забрана за увоз и транзит на живи домашни и диви мали преживари.
Забраната се оденсува, исто така, и на увозот и транспортот низ земјата на семе, јајце клетки и емброни од домашни и диви мали преживари, месо од домашни и диви мали праживари, производи и преработки од месо од домашни и диви мали преживари, млеко и производи од млеко од домашни и диви мали преживари, како и нуспроизводи од домашни и диви мали преживари во Македонија од Бугарија, како и мерки за брза реакција и успешно справување при евентуална појава на болеста и во земјата
Чумата кај малите преживари е вирусно заболување кое брзо се шири во стадото и предизвикува големи економски загуби кај оваа категорија животни и не претставува опасност за луѓето. Симптоми по кои може да се препознае ова заболување во стадото се: треска, рани во устата, дијареа, пневмонија (проблеми со дишењето), абортуси кај гравидните животни, смрт кај животните. Болеста најтешко се манифестира кај младите животни, а кај козите повеќе од овците.
Вирусот се излачува преку солзите, назалниот секрет, со кашлање и преку изметот од заразените животни, а болеста се шири преку директен и близок контакт меѓу животните. Водата, коритата за исхрана на животните и постелката, исто така, може да бидат контаминирани со секрети и да бидат дополнителни извори на инфекцијата.
Чумата кај малите преживари е болест која се наоѓа на листата на болести на Светската организација за здравствена заштита на животните (OIE) кои задолжително треба да се пријават.
Од Агенцијата за храна и ветеринарство апелираат до одгледувачите на овци и кози, до ветеринарните друштва и официјалните ветеринари да го пријават секое сомнително грло и доколку и кај едно животно забележат симптоми на оваа болест, на сите животни од одгледувалиштето да им се оневозможи движење надвор од одгледувалиштето од каде не смее да се изнесуваат и производи од животинско потекло, опрема, измет и ѓубре.
Агенцијата достави известување до сите ветеринарни друштва да го зголемат нивото на претпазливост и веднаш да пријават до официјалните ветеринари евентуални сомнителни грла.